٤٥ ساڵ لەدووری شەهید مەلا عەلی
به‌شی یه‌كه‌م
ئەگەر سەیرێكی مێژووی یەكێتیی نیشتمانیی كوردستان، بكەیت و لەناویدا كۆمەڵە، بۆت دەردەكەوێت كەم شوێن هەیە داستان و قارەمانێتی پێشمەرگەی یەكێتی و كۆمەڵەی تێدا تۆمارنەكرابێت. سەیری زیندانەكانی فاشیستەكانی بەغدا دەكەیت بۆت دەردەكەوێت زیندانیانی سیاسی كوردستان و لەناویاندا تێكۆشەرەكانی "ی.ن.ك" چۆن رووبەڕووی جەللادان وەستاون وەك قەڵای پۆڵاین بەرگەی هەموو نەهامەتییەكانی زیندانیان گرتووە ئاخر پێشمەرگەی كۆمەڵەو یەكێتی لەسەر بیروباوەڕی .
گەر ببمە كێوی ئاڵتون
بۆ رەنجدەران دەتوێمەوە
هەزارجاریش گیان بەختكەم
لەناوخوێندا بتلێمەوە
هەردێمەوە ناو كۆمەڵەو سرودەكەی دەڵێمەوە
پەروەردە كرابێت چۆن فاشیسته‌كان و جه‌للادو زیندان، له شەهید مەلا عەلی و هەزاران تێكۆشەری تر ناترسێن.
مەلا عەلی لە سێدارە دەدرێت
لەودنیاش هەرپێشمەرگەو كادرم
هیج نەبێ لەوەی ئێستا چا ترم
شەوی(22/23/7) شەهید مەلا عەلی، لە قەسابخانەكەی موسڵ لەسێدارە دەدرێت. جارێكی تر ئەو زامەی كە (٤٥) ساڵ لەمەوبەر لەسەرجەستەی كوردستان. دروستبوو، بۆ هەمیشە دەكولێتەوەو خوێنی لێدەچۆڕێ و ساڕێژ نابێ. لە سەعات (30-11)ی شەودا، مەلا عەلی، پەتی قەنارەی سەربەرزی، دەنێتە گەردن و بەجەلادەكانیشی دەڵێت:
"القرار بیدكم، والتأریخ لم یرحمكم.."
شەهید مەلا عەلی... پەتی قەنارە دەكاتە گەردن و دەنووسێت:
مەرگی ئاوا ناگۆڕمەوە بەسەد ژین
ژینێك سەرم بۆ دوژمن بێ بە پەرژین
سەربەرزییە كە پێڵاوم ئەبینن
بەسەر سەری دوژمنەوە لەبەرزین.
مەلا عەلی؛ شادومانە كە تا دواهەناسە بەپێوەیە‌و دەشنووسێت:
نەڵێن دەمرێ و لەترسی مەرگ پەشێوە
پێشمەرگە بم، هەر ئەكەومە پێش ئێوە
بەمەرگی پێش مەرگی ئێوە ئاسودەم
یادێكی كوردستان
هاتەوە یادم شەوێكی قەندیل
هێنایە گریان دڵەی مات و دیل
ئەو دەستەی لەوێ بەفراو ئەتەزاند
داخ كراوە لێرە بە ئاگر و ژیل
بە دەم رێگەوە بە نوكتە بازی
پیشێ‌نمان ئەدا وەزعی ناڕازی
نەمان ئەزانی، چۆن ئەبڕێ وا زوو
رێ ی دووری بەرە و لوتكەی هەورازی
سەرماو هەورازی قەندیل پیرۆز بێ
هەموو ئومێدتان هەر بە نەورۆز بێ
فەرامۆش ئەبێ، ئەوكاتە هەرچی
رۆژێكی زستان سەخت و ئاڵۆز بێ
قەندیل كوێستانی دڵگیری وڵات
هەر هەتاكو- ئاب - داڵدەتان ئەدات
ئیتر دەواری داڵدە نامێنێ و
تارای زیوینی نوێ ئەكرێ خەڵات
دواییش جریوە و بەفراوی بەهار
ئەسڕێ لە دڵان خەمی رۆژگار
ئەدڕی لە بەریا بەرگی وەرزی كۆن
ئەیگۆڕێتەوە بە شاڵی گوڵدار
چەندەش ماندووبن ئەحەسێنەوە
مادام بە ئازاد سەر ئەنێنەوە
مادام بە ویست و ئارەزووی خۆتان
دەستتان بە چەكی تۆڵە ستێنەوە
خۆزگە منیش هەر لەوێ مابایەم
چەكەكەم بەس بوو لە جێ ی سەرمایەم
رانابرێ تەمەن لەم گەرمەسێرە
چونكە پەروەردەی ئەو جێ سەرمایەم
هاتەوە یادم شەوێكی - سارا -
لە نێو كەژاوەی وەرزی بەهارا
چیمەن راخەر و، ئاسمانی شینی
پڕ لە ئەستێرەش، دەسماڵ و تارا
وەك رازانەوەی ئاڵ و واڵای بووك
لەناو ئامێزیا لەشم ئەبوو سووك
چۆن بەسەر بووكا نوقڵ ئەبارێ
بە ئێمەش ئەبڕا نوقڵی بەڵاڵوك
كانی بەفراوی پڕ لە زیخ و چەو
ئەفسوونی ئەڕشت لەبەر مانگەشەو
خشەی دارمازووی بەرشنەی فێنك
چپەی دوانی بوو لە جێژوانی ئەو
جریوەی مەلی لانە لێ ون بوو
شمشاڵی شوانی شیعری (هێمن) بوو
داری جێ لانەی شەوی رابووردووی
بێلانەیەكی تری لە بن بوو
شەو ئێشكچی بووم لەگەڵ هاوڕێ یەك
لە شوێنێكی بەرز لە بن هەرمێ یەك
خەیاڵی خاویش خولیا و خەریكی
گەڕانی خۆی بوو بۆ هەموو جێ یەك
جارێك پەپوولە و، جارێكیش مەل بوو
جارێك پشت كۆم و دەست كۆڵ و شەل بوو
جارێك فیشەكی ناو لوولەی چەكی
پارتیزانێك بوو، چاوەڕێ ی هەل بوو
جارێك بە هەوای هەناسە ئەبزووت
جارێك جێگرتوو وەك كێوی - برزووت
جارێك سەهۆڵی چۆڕاوگەی دۆڵی.
كوێستان و ، جارێك پشكۆی سەرە بزووت.
لەساڵی (١٩٥٣) دوو منداڵی دووانە لە دایكبوون بەناوی "ئەحمەد و حسێن" لەخێزانێكی جوتیارو هەژار لەگوندی بەربەردی ناحیەی ماوەت سەربەقەزای شارباژێڕ هاتنە دنیاوە، ساڵی (١٩٥٨) لەدەست چەوسانەوەو هەژاری گواستیانەوە چوونە گوندی "كۆپەی" ناحیەی سورداش ساڵی (١٩٥٩) تا (١٩٦٠) لەخوێندنگای سەرەتای چەرمەگا ناونووس كراوە ساڵی (١٩٦٢) تا (١٩٦٣) دوای سووتانی گوندەكانی ئەو ناوچەیە پۆلەكانی سەرەتای لە سەرچنارو ماوەت و چەرمەگا تەواو دەكات، چۆتە خوێندندنگای ناوەندی (وەطەن) لە سلێمانی هەر لەوساڵەدا چۆتە ریزەكانی قوتابیانی كوردستان ساڵی (١٩٧٢) تا (١٩٧٣) چۆتە خوێندنگەی ئامادەی سلێمانی هەرلەوساڵەدا پەیوەندی دەكات بەكۆمەڵەوە.
ساڵی (١٩٧٥) تا (١٩٧٦) چۆتە زانكۆی سلێمانی كۆلێجی ئاداب بەشی كوردی تا قۆناغی دووه‌می خوێندووە. كە فه‌رمانی گرتنی لەلایەن رژێمی گۆڕبەگۆڕی بەغداوە بۆ دەردەچێت بەردەستیان ناكەوێت رۆژی (11/5/1977) خۆی گەیاندۆتە ریزەكانی هێزی پێشمەرگەی كوردستان (30/1/1979) لەكاتێكا بۆكارێكی شۆڕشگێرانە لەگەڵ هاوڕێی دكتۆر "مارف عوسمان عه‌بدولڕه‌حمان عەسكەری" دەچێت بۆ گوندەكانی ناوچەی سورداش بەدیوی گوندی گرژە، دوژمن پێیان دەزانێت و بەهێزێكی گەورەوە گه‌مارۆ دەدرێن باش بەرگرییەكی توند بریندار دەكرێت و لەگەڵ هاوڕێی ناوبراو بەدیلی دەست گیردەكرێن لەدوای گرتن و ئەشكەنجەدان و ئازارێكی زۆر شێرانە دانبەخۆیدا دەگرێت و سەربەرزانە سەریان بۆ نەوی ناكات لەڕۆژی (6/6/1979) بەناوی دادگای هەئیەی خاصەی كەركوك دادگای دەكرێت و بڕیاری لە سێدارەدانی بۆ دەردەكەن لەدوای دەرچوونی فەرمانی لە سێدارەدانیەوە تا رۆژی جێبەجێكردنی فەرمانەكەی كە تەنها مانگ و نیوێكی خایاندووە شەوی(٢٢/٢٣/٧/١٩٧٩) لە قەسابخانەكەی موسڵ لەگەڵ دوو هاوڕێی تری بە ناوەكانی "ئەڵوەند عومەر عەلی" و "عەلی عالی حسێن" لە سێدارە دەدرێن.
وەكو چەندین تێكۆشەری دیكەی كورد تەرمەكانیان نەداوەتەوە بە كەسوكار و هەر لەو ناوە لە "وادی عەطاب" بەدەر لە هەموو دابونەریتێكی دینی و كۆمەڵایەتی كراون بەژیر خۆڵەوە و نێژراون. پاش چەند رۆژێك بە لێهاتوویی كەسوكاریان توانرا گۆڕەكانیان بدۆزرێتەوە و دیاری بكرێن كە كامیان گۆڕی كامیانەو كێلیان بۆ دابنرێت. لەدوای پرۆسەی ئازادی عێراق لە مانگی (6/2003) روفاتی پیرۆزی لەگەڵ چل شەهیدی سەربەرزی گەلەكەمان هێنرانەوە بۆ باوەشی نیشتمان و دوا ئارامگای پیرۆزیان لە گردی ئابڵاخ بە خاك سپێردران.
حوزەیران
هەموو مانگی ساڵ بوون بە حوزەیران
هەموو وەرز بوون بە وەرزی خەزان
كام گەلی دنیا وەك كورد بێ بەشە
بەرگ و كاڵایان سەرتا پا رەشە
هیچ ماڵێك نیە بێ قوربانی بێ
ساتێكی ژینی شادمانی بێ
پیر و لاو هەموو لە رێی نیشتمان
بەشیان كوشتنەو لە سێدارەدان
كەوابێ بۆچی ژین لام شیرین بێ
دڵ پڕ لە كوڵ و، چاو پڕ ئەسرین بێ !
ئێستا ژینی خۆم هێند لا هەرزانە
سەد جار قوربانی ئەم كوردستانە
قوربانی چینی چەوساوەی ئەكەم
كورد بە ملیۆنی وەك من نابێ، كەم
زیندانی موسڵ بەشی سێدارە
١٩٧٩/٦/٢٠
حوزەیران ؛ مەبەستی لە یادی حوزەیرانی خوێناوی (١٩٤٧) و (١٩٦٣)یەو خۆشی هەر لە مانگی حوزەیران فەرمانی لە سێدارەدانی بۆ دەرچووە.
دوعاكەی دایكی شەهید مه‌لاعەلی و بەروارێكی سەیر
هەمیشە دەڵێن لەبەینی خوای پەروەردگار و مەزڵومدا خودا پاڕانەوە رەتناكاتەوە كاك ئەبوبكر كۆكەی لە نوسینێكدا سەبارەت بەشەهیدبوون. شەهید مه‌لاعەلی دەڵێت:
"كاك عه‌بدوڵڵای برام كە هاوڕێی شەهید مەلا عەلی بوو بۆی باسكردم حاجی ژن عایشە جێگای بەهەشت بێت كە دایكی شەهید مەلاعەلی بوو، لەوكاتەداو دواتریش دەستی بەرزدەكرده‌وە بۆ بارەگای خوای گەورەو دەیووت خوایە گیان، سەدام چۆن جەرگی منی سووتاند تۆش ئاوا جەرگی بسووتێنە، خوای گەورە دوای زیاتر لە (۲٤) ساڵ دوعای حاجی ژنی قبوڵ كرد لە بەرواری(22/7/2003) هەردوو كوڕی سەدام عودەی و قوسەی لە شاری موسڵ كوژران بەدەستی ئەمریكییەكان كە هەموو كەس ئەوبەروارە دەزانن.
وە ئەمە ئەو فەرموودەی خۆشەویستمانە كە دەفەرمێ، دوو تاوان هەیە خوا لە دنیا تۆڵەیان دەكاتەوە یەكەم، زوڵم كردنە، دووەم ئازاری دایك و باوك. ئەوەی سەیرە بەروارەكەیە كەڕۆژی شەهیدبوونی شەهید مەلاعەلی هەمان رۆژی لەگۆڕنانی هەردوو بەچكە تاوانباری سەدام عودەی و قوسەی بوو.
دوانامەی شەهید "حسێن مەولود" ناسراو بە مــــــەلا عەلی، ئەم نامە یە (٤٥) دەقە پێش لەسێدارەدانی
بۆ كەسوكاری نووسیوێتی:
(بســــــــــــم اللە الرحمان الرحیم)
خزمان براكانم دایك و خوشكەكانم، باوكە گیان داواكارم لە یەزدانی مەزن كەوا خوا سەبوویت بدا.. باوكە گیان: زۆر بەداخەوەم كەوا لەسەرە مەرگدا نەم بینیت كەوا ریشە سپیە پر غەمەكەت ماچ بكەم.. برایانم تكام وایە كە گوێڕایەڵی قسەی دایك و خاڵ و مام و باوكم بن وە لە قسەی باوكم دەرنەچن بەهیچ جۆرێك.. هاوڕێی شیرینم غازی فا‌‌صل دێت بۆلاتان هەروا بزانن من هاتوومەتەوە..
ئیتر بەخواتان ئەسپێرم
حسێن مەولود
ژووری سێدارەی موسڵ
شەوی(22/23/1979) كاتژمێر (11:15) چاوەڕێی خنكاندنم.
بەخێوتان كردم
بەخێوتان كردم هۆ بابەو دایە
ویژدانم لە ژێر قەرزتان دایە
(وام) داری ئێوەم ، بۆیە لە تاوان
پێموایە ئێسكم ئەكرۆژێ تاوان
تاوانی ئەوەی لە پێناوی من
رێتان كەوتۆتە بەر ماڵی دوژمن
تاوانی ئەوەی بۆم نەلوا دەرفەت
لابەم لە سەرتان ئازاری خەفەت
قەرزی وڵات و گەلم دایەوە
بەڵام ئی ئێوەم لە سەر مایەوە
خاڵ و خوشكەزا، ئامۆژن و مام
خوشك و برازا، براژن و برام
دۆست و دراوسێ، برادەر و هاوڕێ
ئەوەی جارێك دیم لە دوو هەنگاو رێ
پورزاو خاڵۆژن، ئامۆزام و پوور
خزم و كەسوكار، لە نزیك و دوور
ئەڕۆم پێشوازی لە مردن ئەكەم
لە ئێوەش داوای لێبووردن ئەكەم
لە دڵ رەنجانی ئێوە ئەترسام
دەنا بێ سڵ بووم لە مەرگی بە سام
لە زۆردار نەبێ، لە كەس نەڕەنجام
كەم ئاواتیشم، گەیشتنە ئەنجام
ئاواتەخوازبووم لە دوای رۆژی رەش
بووكی ئازادی بگرمە باوەش
بچمەسەر لوتكەی بەرزی حەسارۆست
بانگ بدەم بە گوێ ی خزم و برا و دۆست
كەم خواست و خۆزگەم گەیشتە ئەنجام
هێشتا لە رۆژی هیوا نەڕەنجام
هەر بە ماندوویی ماوم تا ئێستا
لە ڕێ ی چاكە بووم سوێند بە ئاوێستا
ئەوەی چاكە بوو لە ژینا كردم
هەر بە سەربەرزی ژیام و مردم
وەسیەتم وایە هەتا بمێنن
لە خۆتانەوە كەس مەڕەنجێنن
پرسەم بۆ مەگرن، نەكەن بۆم بگرین
مەڵێن با قوڕی بۆ لە سەر بگرین
(گریان كردەوەی بێ دەسەڵاتە)
(تووڕەیی شۆڕش) خەندەی وڵاتە
دەرمانی دەردم ناكا شۆڕ و شین
چۆن رزگار دەبین بەبێ (شۆڕ) و (شین)
لە بری بەرگی رەش، سەرتاپا خاكی
لەبەركەن هەتا نامێنێ ماكی
ئیمپریالیزم و بازرگانی جەنگ
دەر ئەپەڕێنرێن بە لوولەی تفەنگ
وڵات جێدێڵن دوژمنانی گەل
خۆری ئازادی هەڵدێ لە دەم كەل
كاتێ وڵاتی لە خوێنا رەنگاو
رزگاری ئەبێ هەنگاو بە هەنگاو
زانست و بیر و پێنووس و مەچەك
شەن و پاچ و بێڵ، چەكوش و داس و چەك
بۆ گەل بێ پیر و مناڵ و گەنجی
نۆشی گیانی كات بەرهەمی رەنجی
تا ئەوسا ناوی ئێمەش ئەمێنێ
پەیكەرمان خەڵكی تێ ی رائەمێنێ
تا بە زیندوویی لەم سەر خاكەبن
وەسیەتم وایە روو لە چاكەبن
سەر ئەنجامی ژین تەنها مردنە
ئەوەی زیندووبێ، چاكە كردنە
شەهید مەلا عەلی
(1/3/1979) كەركوك.
شەهید مەلا عەلی و بواری ئەدەبی
شەهید مەلا عەلی، هەر لە سەرەتای ژیانیەوە كە فێری خوێندن بووە، خولیای ئەدەب و نووسین بووە، وە نەبێت تەنها لە بواری شیعردا رۆڵی هەبووبێت، بگرە لە بوارەكانی دیكەی ئەدەبدا وەك چیرۆك و پەخشان و وەرگێڕاندا دەستی هەبووە. لە ژیانیدا هەرگیز تەنها بە كارێكەوە خەریك نەبووە، لەبەرئەوەی لەلادێ ژیاوە، رۆژانەش كە لە خوێندنگە گەڕاوەتەوە خەریكی ئیشوكاری كشتوكاڵ بووە، یان شوان بووە، بەڵام پتر ئارەزووی لە شوانی بوو، لەبەرئەوەی دەیتوانی لە دەشت و كێو شوانیش بكات و خۆشی پەروەردە بكات بەخوێندنەوه.
هەمووجار دەیوت باشترین شوێن بۆ خوێندنەوە و تێگەیشتن و وەرگرتنی بابەتەكان دەشت و دەرە، لەلایەك هەوای پاك و هێمن و دڵگیرە، لەلایەكی ترەوە هیچ كەس خەریكت ناكات بەشتێكی لاوەكیەوە، بۆیە كەمتر ئارەزووی بەكاری كشتوكاڵی بوو، دەیوت؛ لەم بوارەدا مرۆڤ دەبێ هەردەم دەست و مێشكی خەریك بكات بە ئامێرەكانەوە .
شەهید مەلا عەلی، هەرچەندە لە خێزانێكی جووتیاری هەژار بوو، بەڵام لایەنە ئەدەبییەكانی فەرامۆش نەدەكرد و ببوونە خولیای. هەتا ئەوكاتەی پەیوەندی كرد بەهێزی پێشمەرگەی كوردستان لە هەرێمی چواری ئەوسای یەكێتی نیشتمانیی كوردستان كە رۆژی (11/5/1977) بوو ئەم بەرهەمانەی هەبووە..
أ - كورتە چیرۆك:
١- شانەی گەنم.
٢- كۆچەری .
٣- سێبەری سابات .
٤- بەری دارەبەن .
ب - دیوانی شیعریی كلاسیكی و نوێ كە پتر لە (١٠٠) لاپەڕەیه .
ج - وەرگێڕان
١- كۆمەڵە چیرۆكی - الارواح المتمردە - ی جوبران خەلیل جوبران بۆ كوردی لە عەرەبیەوە .
٢- پەڕتووكێكی بڕیار لەسەر دراو بۆ خوێندنی كۆلێژی ئاداب بۆ زمانی كوردی لە عەرەبیەوە .
٣- هەندێ نامیلكەی ماوتسی تۆنگ بۆ زمانی كوردی لە عەرەبیەوه.
٤- نامیلكەی - یومیات جندی الڤیتنامی - بۆ زمانی كوردی لە عەرەبیەوە .
٥- هەندی شیعری شاعیری گەورەی فەلەستینی مەحمود دەروێش وەك:
سروودەكانی بەرگری فەلەستینی و چەندی تریش .
د - ئاخاوتنێك لەگەڵ چەند كادرێكی حیزبی دیموكراتی كوردستان - ئێران، لە حەفتاكاندا، لەگەڵ چەند بابەتی تری بەكەڵك .
شەهید مەلا عەلی بەرلەشەهیدكردنی چەندین. پارچە شعری زۆر ناوازەو جوان دەنووسێت لەزینداندا، كەهەمووی دەرخەری ئەو راستییەیه كە چەند بێباك بووە لە مەرگ و سێدارەو ویستوێتی بڵێ بەمەرگی ئەم كورد لەبن نایەت و شۆڕش بەردەوام دەبێت دیارترین. شیعری شەهید مەلاعەلی سێدارەیە كە هونەرمەندی نەمرو پێشمەرگە حەمە جەزا كردوێتی بە كارێكی جوانی هونەری و بۆتە وێردی بەشی هەرەزۆری خەڵك كە شەهید مەلاعەلی دەڵێت:
زۆربەی شیعرەكانی ئەم دیوانە بە ناوەڕۆك گەورەیە، لە ماوەی ئەو مانگ و نیوەی كە لە ژووری بەندیخانەی قەسابخانەی موسڵدا ماوەتەوە لە چاوەڕوانی سێدارەدا نووسیویەتی، وەك دەربڕینی هەڵوێست و نەبەزینی خۆی لە رۆژانی چاوپێكەوتندا ناردوونیە دەرەوەی بەندیخانە جگە لەم شیعرانە چەندان نامەی شۆڕشگێڕانەی لە شێوەی پێسپێریدا ناردووە بۆ هاوڕێ و هاوسەنگەران و ناسیاوانی دەرەوەی بەندیخانە، كە تێیاندا داوایان لێدەكات خۆڕاگرو دڵسۆزی گەل بن و ریزەكانی گەل و شۆڕش پتەوتر بكەن، دوا تكاو داواشی لە هاوڕێیانی كۆمەڵەو هاوسەنگەرانی و دۆست و ناسیاو و كەسوكار و خزمانی ئەوە بووە كە رێبازی شۆڕشگێڕیەتی ون نەكەن و لە كەم و كوڕییەكانی ئەم ببوورن.
سێدارە
برا دوور و خزم دوور و كەسم دوور
بە نا بەڵەد ، تەمەن ئەمبا بەرەو ژوور
بەڵام روونە بەرەو سێدارە چوونە
خەنەی خوێنم لە پێ ئەگرێ ئاڵای سوور
بەرەو ژووری بەرەو ژووری سێدارە
ماندووی كردووم و شوێنەكەم شێدارە
كە نیشانەی پەشێوی پێوە شێوەم
ئەوە برینی ئەشكەنجەیە و جێ دارە
نەڵێن؛ ئەمرێ و لە ترسی مەرگ پەشێوە
پێشمەرگەبم هەر ئەكەومە پێش ئێوە
بە مەرگی پێش مەرگی ئێوە ئاسوودەم
رووشم ، زەردەی پێكەنینی هەر پێوە
گەرچی بەرەو دوا ماڵی ژین بەڕێوەم
یەكەم ماڵی نەمردنم دیارە لێوەم
بەشم چونكە مردنی ناو جێ نیە
شادم كە تا دوا هەناسەش بە پێوەم
مەرگی ئاوا ناگۆڕمەوە بە سەد ژین
ژینێك سەرم بۆ دوژمن ببێ بە پەرژین
سەربەرزیە كە پێڵاوم ئەبینن
بە سەر سەری دوژمنەوە لە بەرزین
پێ لە سەریان دائەنێم و ئەڕوانم
بەرەو شاری جێ هەواری كاروانم
ئەگەم پێ یان چونكە دیارە جێ پێ یان
ئێرەیە و لێی لانادەم تا ئەتوانم
ئەوا ئێستا كەوتوومە شوێن پێشڕەوێك
كە لێرە بووە لە پێش مندا چەند شەوێك
دیارە منیش هەر ئەوەندەی لێ ئەبم
وا بە نوێنی ئەو ئەشكێنم سەرخەوێك
خۆ بەنوێنی جێماوی دائەپۆشم
تا پێ ی سووك بێ، ئێسكی لاشەی نەخۆشم
بۆتە بەڵگە بە شوێن ئەودا رۆیشتنم
ئاخۆ كێ ی تر پێ ی دێتە شوێنی خۆشم
دیسان رێگای شوێنێكی كەم لە پێشە
رێ ی گۆڕستان كە دڵنیام ئەو لەوێشە
ئەگەر لاشەم نەشێ ببرێتە شوێنی
گیانم لە سەر گڵی سەر گۆڕی مێشە
كە دڵنیام ئەچێتە جێ ی شانازی
لەو ڕێ یەدا منیش ئەكەم گیان بازی
كە ئەو خوێنی خەڵاتی رێ ی خەباتە
خوێنی منیش ئەنەخشێنێ رێبازی
ئەو مەرگەی لێم ترساوە ئەیلاوێنم
بۆ ناوێرێ بێت و بگرێ داوێنم
با بمناسێ كە پێشمەرگەی - كۆمەڵە - و كادرێكی دەست و داوێن خاوێنم
كە پاش مردن هەبوو دنیایەكی نوێ
تا ئەوكاتە با گیانیشم تێر بنوێ
چونكە رۆژی هەستانەوە، دەرفەتی
فرمانێكی وەك ئێستام هەر بۆ ئەلوێ
لەو دنیایەش هەر پێشمەرگەو كادرم
كە هیچ نەبێ لەوەی ئێستا چاترم
لێرە خاوەن ئەزموونی رێی خەباتم
لەوێ لەنێو كورەی شۆڕش ئاگرم
ئەگەر لێرە نەمتوانیبێ بجەنگم
لەوێ بە دەست هاوڕێ یەكەوە تفەنگم
ئەگەر لێرە بەجێ مابم لە كاروان
لەوێ لە پێش كاروانەوە پێشەنگم
زیندانی موسڵ بەشی سێدارە
(18/6/1979)
_______________
ئه‌م بابه‌ته له سایتی PUKmedia بڵاوبۆته‌وه.
كاوان ئەحمەد حه‌مە ساڵح هەڵەبجەیی، ئاماده‌ی كردووه.
بابەتی زیاتر