کاتژمێر ١٠ى پێشنیوەڕۆى رۆژى ٢٩/٧/٢٠٠٤و لە هۆڵى مەڵبەندى رێکخستنى چەمچەماڵ، بۆردی هۆشیاری- مەکتەبی راگەیاندن و هۆشیاری، لە چوارچێوەی چالاکی هۆشیاریی حزبیدا و بەئامادەبوونى لێپرسراوى مەڵبەند "سەرکەوت حەسەن" و ئەندام و کارگێڕانى مەڵبەند و نووسەر و رووناکبیرانى دەڤەرەکە هەردوو نووسەر "فەرید ئەسەسەرد" و "رێکەوت ئیسماعیل" خوێندنەوەیان بۆ نامیلکەکانیان کرد..
سەرەتا "فەرید ئەسەسەرد" نامیلکەکەى بەناونیشانى "یەکێتیى نیشتمانیى کوردستان و رەهەندەکانى جەنگى جیهانیی دژ بەتیرۆر" بەئامادەبووان ناساند و لە درێژەى خوێندنەوەکەیدا ئەوەى خستەڕوو کە تیرۆر مێژوویەكی زۆر كۆنی هەیە و لە رۆژگاری هاوچەرخماندا، هێرشەكانی ١١ی سێپتێمبەری ٢٠٠١ی مانهاتن وەك سنوورێكی جیاكەرەوە بــۆ دەستپێكی جەنگی دژ بەتیرۆر لە زەینی هەموو كەسێكدا چەسپیوە..
باسى لەوەش کرد جەنگى دژ بەتیرۆر بـەهاوپەیمانی ٨٠ دەوڵەت و لە هەموو سوچێكی دنیادا پیادەكرا. وردتر چووە ناوباسەکەوە و باسى لەو مەترسییە گەورەیە کرد کە رووبەڕووى هەرێمى کوردستان بۆوە و بووە گۆڕەپانی ئـەو جەنگـە ترسناکە، جەنگێك ئەو پێیوابوو هەتا ئەمڕۆ بەردەوامی هەیە.
پێی گرنگ بوو رۆڵى گەورەى "یەكێتیی نیشتمانیی كوردسـتان" نادیدە نەگیرێ و لە دوای راپەڕینی ساڵی (١٩٩١)ەوە، وەکو هێزێک کە خاوەنى قورسایی سیاسیی و عەسکەرى خۆى بوو لە هەرێمدا و ئــەو دەسەڵاتەشی لە شەرعییەتی هەڵبژاردنەوە بەدەستهێنابوو. بەڕێز ئەسەسەرد، ئەو راستییەى خستەڕوو کە تێگەیشتنی یەکێتیی نیشتمانیی کوردستان بــۆ پرسی تیرۆر روون و ئاشکرابوو، تێگەیشتنێک بوو کە پێناسەکەی لە چەمکەکانی دیموکراسی و پلورالیـزم و سـیکولاریزمەوە هەڵقوڵابـوو، بەبەوتەى ئەو روون و سادەیی لە چەپکە گوڵەکەدا درەخشان دەکرد.
لە ماوەى خوێندنەوەکەیدا زانیارى زۆرى خستەڕوو کە یەکێتى مەسـئولانە و لـە پێگـەی حکومەت و دەسـەڵاتەوە مامەڵەی لەگەڵ پرسەکەدا کردو پێناسەی تیرۆریشی هـەر لەناو بڕگە یاساییەکاندا داڕشت.
بەڕێز ئەسەسەرد، جارێکیتر پەردەى لەسەر ئەوە لابرد کە فەلسەفەی چەپکە گوڵەکەى هەڤاڵ "مام جەلال"یش ئـەوەبوو کە ئەم وڵاتە جوانەی خۆمان باخچەیەکی رەنگینە و جێگای هەموو گوڵ و رەنگەکانی تێدادەبێتەوە و هەر بەمیکانیزمە سیاسی و یاسایی و دیموکراسییەکان هەمـوو شەبەنگە سیاسی و کۆمەڵایەتییەکان دەتوانن خۆیان بەیان کەن و بێنە نێو کایەکەوە. ئەو خاڵەشى بەبنچینەیی دانا پێناسـەی یەکێتیی نیشتمانیی کوردستان بـۆ تیرۆر هەرپێناسەیەکی سیاسی نەبـوو، بەڵکو پێناسەیەکی یاسایی بـوو كە بەند و بڕگەكانی هەڵقوڵاوی ئەو خەبات و ماندووبوون و قوربانییە زۆرەبوو کە گەلی كوردستان بـە خاك و خۆڵی ئـەم وڵاتەیان بەخشـیبوو.
لە درێژەى خوێندنەوەکەیدا باسى لەو مەترسییە کرد کە تیرۆر وەکو تەور و شمشێری هاوردەكراو، ئەوانەی رۆژێك لە رۆژان لــە سێبەری داربەڕویەكدا شنەبای ئـەم وڵاتە لێی نەدابوون، لەو دیو سنورەكانەوە فەرمانیان پێكرابوو حكومەتی هەرێمی كوردستان و خودی یەكێتی بخەنە ناو زائیدەکەوە.
بەیەقینەوە باسى لەوە کرد کە یەكێتی مەسئولانە هەڵوێستی نواند، بۆ ئەوەی گەل و نیشتمان سەلامەت بێ و بەرامبەر بەو رەشەبا زەردەی ئـەو دیو سنوورەكان بـە پێوە بمێنێتەوە و سنگی خۆی بداتەبەر تیری غەدر و نامەردانەی تیرۆر. ئەو راستییەشى نەشاردەوە راستە تیرۆر زەبری زۆری لە یەکێتى وەشاندووە، گیانی زۆرى تێکۆشەرانى لێبردووین، بەڵام ئیرادەی كوردبوون بەهێزتربوو.
بەهیواوە و پڕ لە ئیرادە ئەوەى بۆ ئامادەبووان روونکردەوە کە چەپکە گوڵەکەی مامی هەمیشە زیندوو درەوشانەوەیەک بوو تەنانەت بەشێک لە گومڕاکانی نـاو تیرۆرستانیشی هێنایە ناو کایە دیموکراسییەکە و فێریکردن کە ژیان رەنگاو رەنگە و بـە هەموو رەنگەکانەوە تابلۆکە تەواو دەبێت.
ئـەم نامیلکەیە مەترسى تیرۆر و رۆڵی مێژوویی گرنگی یەکێتیی نیشتمانیی کوردستان و سەرۆک مام جەلال، لە پرسی رووبەڕووبوونەوەی تیرۆردا دەخاتەڕوو. بـۆ کادیری حزبی رووندەکاتەوە کە ئــەوە یەکێتیی بوو بەدرێژایی بوونی خـۆی لـە گۆڕەپانی سیاسیدا دوژمنی سەرسەختی تیرۆر و تووندڕەویی سیاسـی بـووە خوێندنەوەی واقیعی و دروستى بۆ جەنگی تیرۆر هەبووە.
دوابەدواى ئەو دووەم نامیلکە سەردێڕى "پۆپۆلیزم و دیدگاى یەکێتیى نیشتمانیى کوردستان" لەلایەن "رێکەوت ئیسماعیل" نووسەرى نامیلکەکەوە خوێندنەوەى بۆ کرا و زاراوەی پۆپۆلیزم-ى پێناسە کرد و ئەوەى بۆ ئامادەبووان شیکردەوە کە پۆپۆلیزم مێژوویەكی زۆر كۆنی نییە لە ئەدەبیاتی سیاسیی كورددا، ئەوەشى خستەڕوو کە ئەو چەمکە تازەیە و سەرەتای بەكارهێنان و ئاماژە بۆ كردنی دەگەڕێتەوە بــۆ هەشتاكانی سەدەی پێشوو.
بەوردى ئاماژەى بۆ ئەوە کرد كە پۆپۆلیزم و بەكارهێنان و برەوسەندنی زاراوەكە دەگەڕێتەوە بۆ دوای دروستبوونی بزووتنەوەی گۆڕان. ئەوسا هەندێ لە شرۆڤەكارانی سیاسی بێلایەن و لایەندار بزووتنەوەی گۆڕانیان وەك کۆمەڵەیەکى پۆپۆلیست وەسف دەكرد. پێیباشبوو ئەو واقیعە بەرجەستە بکاتەوە و بیخاتە پێشچاو کە "یەكێتیی نیشتمانیی كوردستان" پشكی شێری بەركەوتووە لەو شاڵاوانەی كە حزب و رێكخراوە پۆپۆلیستەكان كردوویانەتە سـەری.
رێکەوت ئیسماعیل، نووسەرى کتێبى "پۆپۆلیزم و دیدگاى یەکێتیى نیشتمانیى کوردستان" سەرسوڕمانى خۆى نەشاردەوە، ئەو حزب و رێكخراوانەى لە هەرێمى کوردستاندا نـاو بەناو سـەرهەڵدەدەن یەكەم لایەن یەكێتی دەكەنە ئامانج، بەبڕواى ئەو هەندێكیان خێرا وەكو باڵۆنی فوو تێكراو فش دەبنەوە و هەندێكیشیان ماوەیەكی درێژتر بڕیان كردووە و ماونەتەوە. لە کۆتایی خوێندنەوەکەشیدا ئەو خاڵەشى بە گرنگ دایە قەڵەم لە هەمـوو حاڵەتەكاندا دەبێ یەكێتی ئاگایانە لەگەڵ ئەم سێبەرە لە سیاسەت مامەڵە بكات.
لە کۆتایی هەردوو خوێندنەوەکاندا و لەلایەن ئامادەبووانەوە بەپرسیار و تێبینى و رەخنەکانیان ئەوەندەیتر سیمینارەکەیان دەوڵەمەند کرد. نامیلکەکە پێشکەش بە ئامادەبووان کرا و  لەلایەن هەردوو نووسەرەوە واژۆیان لەسەر کرا.