هەمـوومان دەزانین سـێ شـۆڕشە پیشـەسـازیەکە تا ئێسـتا چەنـدە ژیانـی مرۆڤـیان گۆڕیوە، بەڵام شـۆڕشی چوارەم کە داهێنانی زیرەکی دەستکردە لە 10 بۆ 15 ساڵی داهاتوو چەندەها جـار زیاتر ژیانی مرۆڤەکان دەگۆڕێـت، پێش کۆتایی سـەدەش ئەنجـامەکانی دەبێتە هۆی دروستکردنی مرۆڤی باڵا Super.Human دوای بەستنەوەی مێشکی مرۆڤێکی ئاسایی بایۆلۆژی بە زیرەکی دەستکرد، لەوێوە هەرە زۆرینەی مرۆڤەکان کە لە ژیاندا دەبن بەتەواوی لە هەموو ڕووێکەوە دەبنە مرۆڤێکی باڵا و سایبۆرگ...

دەسـتپێکی شۆڕشی پیشـەسازی داهێنانی هێزی هەڵمی بوو و شۆڕشەکە بەوە دەستی پێکرد، دووەم شۆڕشی پیشەسازی داهێنانی کارەبا بوو، سێیەمیان داهێنانی ئینتەرنێت بوو، زیرەکی دەستکردیش بە شۆڕشی چوارەمی پیشەسازی دادەنرێت، لە چەند ساڵی داهاتوو ئەو داهێنانە مەزنەی ئەقڵی مرۆڤ شۆڕشێکی جیاواز و بێ وێنە لەوانەی تر بەرپا دەکات لەهەموو بوارەکان بەتایبەتی لە بواری داهێنان و لێکۆڵینەوەکان و بەرهەمهێنان، لەهەمان کاتدا گێژاوێکی کاتی و کێشەیەکی گەورەی کاتیش بۆ گەلێک لە مرۆڤەکان دروست دەکات...

مەترسیە هەنوکەییەکانی بەرجەستە بوونی زیرەکی دەستکرد و چوونە پێشەوەی خێرای لەسەرکار لادان و ئیفلاس پێکردنی گەلێک کۆمپانیا و کەسایەتیەکانە وەکو ئەوانەی لەبواری بڵاوکردنەوە و میدیا و ڕۆژنامەوانی و بواری فێرکردن و وەرگێڕان کاردەکەن، بەتایبەتیش ئەو لایەن وکۆمپانیایانەی کاری بڵاوکردنەوەی کتێب و دۆکیومێنتاری و وێنە و ڤیدیۆ دەکەن، هەتا بوارەکانی سێکتەری یاسا و تەندروستی و ئینستیتوتەکانی ئەنجامدانی لێکۆڵینەوەکان و گەلێکی تر دەکەونە مەترسی...

بەڵام پێشبینی دەکرێت لەمەودای دورتر بەتایبەتی دوای پێنج بۆ دە ساڵی تر وردە وردە کارئاسانیەکی زۆر بکات لە زۆربەی بوارەکان و هەتا هەندێک پێیان وایە ئەگەر بۆ کاری خراپ و کوشتن و پەرەپێدانی چەک بەکارنەهێنرێت دەتوانێت یوتۆپیا لەسەر هەسارەی زەوی بۆ مرۆڤەکان بەرپا بکات و چینایەتی زۆر کەمباکەتەوە و ئەوەی هەژارەکانی جیهان نیانە بیخاتە بەردەستیان وەکو هەرزانکردنی وزە، ئاسانکردنی فێربوون، خستنە بەردەستی زیرەکیەکی بێ شومار بۆ هەموو مرۆڤێک بە خۆڕایی بۆ ئەوەی بڕیاری دروست بدەن لە ژیانیان، هەروەها چارەسەری بنەڕەتی بۆ زۆربەی کێشەکانی ئەمڕۆش بدۆزێتەوە وەکو بەرجەستەکردنی وزەی نوێبووەوە و چارەسەرکردنی گۆڕانی ئاو و هەوا ودۆزینەوەی دەرمانی نوێ و چارەسەری نوێ بۆ نەخۆشیە کوشندەکان و درێژخایەنەکان...

لە کۆتاییشـدا هەروەکــو بەر لەچـەند ڕۆژێـک ئیـلۆن مەسـک وتی بەتەمایـە لە ڕێگــەی نیـڕۆلینک کاربکات لەسـەر بەسـتنەوەی مێشکی مرۆڤ بە زیرەکی دەستکرد، بێ گومان ئەمە کار و کاتی زیاتری دەوێت بەڵام دەبێتـە هەنگاونـانی مرۆڤ لە مرۆڤێـکی ئاسایی بایۆلۆژی بەرەو مرۆڤێـکی سایبۆرگ و باڵا...