سەرەڕای ئەو هەموو كێشمەكێشەی كە بەرۆكی بە عیراق و ناوچەكە و جیهان گرتووە و دۆخی نە شەڕ نە ئاشتی، كە لە هەفتەی چوارەمدایە.. لێوارێكی ترسناكە و هێشتا چارەنووسی هەلومەرجەكە روون نییە بەلای سپیدا دەچێ یان بەلای بەڵای شەڕدا جارێكی تر... هێشتا هێز و لایەنەكان هێندەی دڵخوازی عیراقییەكان نزیكنەبوونەتەوە لە یەكتری تا هەنگاوی بەكردەوە بەرەو سازان و پێكهاتن بنێن، چونكە دڕدۆنگی و نەبوونی متمانە؛ تارماییەكە دێت و دەچێ و ماڵی لایەنە سیاسی و پێكهاتە نەتەوەیی و مەزهەبییەكان نەك رێكنەخراوە، بەڵكو شێواویی زۆری پێوە دیارە.
لەگەڵ ئەوەشدا، چوارچێوەی هەماهەنگی، لە گەڕێكی دوورودرێژدا دواجار گەیشتنە ئەو سازانەی، كە كاندیدێكی نوێ بخەنەڕوو بەو نیازەی لە ماوەی مانگێكدا بتوانێت كابینەی حكومەتی نوێ ئامادەبكات و متمانەی دەسەڵاتی یاسادانان وەربگرێت و دەستبەكاربێت.. بەمەش عیراق و حكومەتەكە لە دۆخی نالەبار و حكومەتی كاربەڕێكەر بپەڕێنێتەوە بۆ لانی كەمی كەناری ئارامی و وەرگرتنی شەرعیەتی دەستووری و یاسایی.
ئەوەی ئێستا بەرچاودەكەوێت لەبارەی كاندیدی نوێی كابینەی نوێ لەسەر ئاستی دنیا و ناوچەكە، كاردانەوەكان بە پۆزەتیڤ دەبینرێن، بەتایبەتی لەلایەن ئەمریكا و خودی سەرۆك ترەمپەوە. ئەو هەڵوێستەی ترەمپ رەنگە لە چەند روانگەیەوە بخوێنرێتەوە، جگەلەوەی كە فشار و هەڕەشەكانی بۆ چوارچێوەی هەماهەنگی لە گۆڕینی كاندیدی پێشوویان ئەنجامی هەبووە. لەگەڵ ئەوەشدا عەلی زەیدی كاندیدی نوێ كە زۆرتر كەسایەتییەكی بزنسمانە و پێشینەی زۆر نییە، بەڵام ئەو سیفەتەی نزیكە لە سەرۆك ترەمپەوە، كە ئەویش واتا ترەمپ وەك خۆی دەڵێت «پێش ئەوەی سیاسی بێت، بازرگان و سەرمایەدارە».
عەلی زەیدی، جگەلەوەی پیاوێكی بازرگانی خاوەن كەناڵی میدیایی و سپۆنسەری چەندانی تر دەكات، كە خۆی لەخۆیدا دەبێتە كۆمەكێكی باش بۆ سەركەوتنی لە ئەگەری پێكهێنانی حكومەتەكەیدا. ئەگەر كابینەی حكومەتەكەی عەلی زەیدی؛ متمانەی وەرگرت و دەستبەكاربوو، لەوێوە ئەركە قورسەكان دەستپێدەكات.
عیراق بە كردەوە لەناو بەرداشی چەندین ململانێ و كەیسی چارەسەرنەكراودایە. هەرچەندە عیراق نەچووەتە جەنگی ئەمریكا و ئیسرائیل لەگەڵ ئێراندا، بەڵكو بەشێكی بەرچاو لە خودی شەڕەكە هێنراوە یان هاتووەتە ناو عیراقەوە و بەشێك لە میلیشیاكانیش تێوەگلاون، كە كەیس و گرفتێكی ئاڵۆز و ئاسان و چارەسەركراو نین، ئەوەش وەك گرفتێكی ئەمنیی گەورە چاوی لێدەكرێت، خۆپارێزیی بێلایەنی یان تەرەفداریی بۆ عیراق، ئیحراجییەكی زۆرە و رەنگە زۆریش سەخت بێت خۆساغكردنەوە و هەریەكە لەوانەش باجی خۆی هەیە.
جگە لە كەیسی بودجە و دارایی و ئابووری، پرسی نەوت و گاز و رێككەوتنی نوێی هەرێم و بەغدا و چاودێرییكردنی پرۆسەی رێككەوتن و لێكتێگەیشتنەكان، لە داهاتوودا جارێكی تر نابنەوە گرفتی سەرەكی و دەرگاكان جارێكی تر لەسەر یەكتری دابخەن؟!. بەگشتی كابینەكە لەداهاتوودا لەبەردەم ئەركە قورسەكان و كەیسە چارەسەرنەكراوەكاندایە. كاندیدی نوێ ئەولەویەت لەبەردەمیدا ئەوەیە كە لەو ماوە زەمەنییەدا دوای رازیكردنی لایەنەكان و پشكەكانیان متمانە بەدەستبهێنێت، ئێستا ئەوەشیان ئەركێكی ئاسان نییە. پێشبینی سیناریۆی جیاجیاش دەكرێت.
لە ئەگەری تەواوبوونی ماوەی رێگەپێدراو بۆ پێكهێنانی حكومەت، ئایا ماوەكە درێژدەكرێتەوە؟!، ئایا دوای درێژكردنەوەش ئەگەر كاندیدەكە سەركەوتوونەبوو، ئەگەر و سیناریۆكانی دیكە چی دەبن؟!، وەك عەرەب دەڵێت: لكل حادث حدیث.