سەرژمێری، یان فراوانتر و باشترە بڵێیین (أحصاء) و(تعداد) کە بۆ هەردوکیان ئامار و ژماردن راستە، پرۆسەیەکی گرنگە بۆ هەر وڵاتێک بیەوێ پلان بۆ داھاتووی دابرێژێ و بەپێی ئەو داتایانەی دەستدەکەون چوارچێوەی دیدگای بۆ گەشەسەندن و بەرەوپێشچوون لە هەموو بوارەکاندا دیاریبکات. 
بۆ ئێمەی کورد ئەگەر وا بەسادەیی سەیری بکەین، پرۆسەیەکی پڕ گرنگییە، بەڵام ئەگەر لە رووی نەتەوەییەوە لێی بڕوانین، تووشی ترس و دڵەراوکێ دەبین، بۆچی؟  ئایا وەک تاکی کورد بە ژن و پیاو و گەنج و منداڵ و کوڕ و کچەوە، ژمارەمان چەندە و چەند قورساییمان هەیە لە عیراقێکدا کە بەپێی لێدوانی وەزارەتی پلاندانی عیراق 43 ملیۆن کەس دەبێت؟ 
 
 ئایا ئەو عەرەبانەی لەبەر ھەر ھۆکارێک بێت لە شارەکانی ھەرێمی  کوردستان نیشتەجێن، بە دانیشتوی کوردستانیان هەژمار دەکەن؟
ئایا ئەو عەرەبانەی لەبەر هەر ھۆکارێک بێت لە شارەکانی هەرێمی  کوردستان نیشتەجێن، بە دانیشتوی کوردستانیان هەژمار دەکەن؟، یاخود بەپێی کارتی نیشتمانی مامەڵەیان لەگەڵ دەکەن؟ ئایا ئەو عەرەبانەی لە پرۆسەی تەعریبکردنی کەرکوک و ناوچە دابرێنراوەکانی تر لەپێش روخانی رژێم و پاش روخانیشی کە بەپێی دەستوور بە ناوچەکانی ماددەی 140ناسراون و ھێنراونەتە ئەو ناوچانە، لەسەر ئەو ناوچانە هەژمار دەکرێن؟، یان بە ھاتوو حسابدەکرێن و لەسەر پارێزگا ئەسڵییەکانی خۆیان دەنووسرێن؟  ئایا هەموو ئەو دانیشتوە رەسەنە کوردانەی ناوچەکانی ماددەی 140 کە بەهەر ھۆکارێک لەو شوێنانەی خۆیان دەربەدەربوون، یان بەھۆی کار و کاسبی و وەزیفەوە لەوێ نین، دەتوانن هەرهەموویان بۆ رۆژانی  سەرژمێرییەکە بگەڕێنەوە شوێنەکانی خۆیان تاکو لەسەر ئەوێ ئەژماربکرێن  و لە جێبەجێکردنی ماددەی 140دا رۆڵی هەبێت؟ ئایا کوردانی تاراوگە  کە نزیکەی نیو ملیۆن کەس دەبن دەچنە نێو ئەم پرۆسەیەیەوە و لەسەر کوردستان دەژمێردرێن؟ لەپاش پرۆسەی ئازادی عیراقپش کوردستان لە بودجە و بابەتەکانی تردا کە 17 ٪ بووە و دواتر 14،50 ٪ و لە راستیشدا    بودجە 11،6 بوو، ئایا پاش تەواوبوونی سەرژمێری، دەکرێتە چەند کە پشکی پەرەپێدانی پارێزگاکانیش دەگرێتەوە؟ پشکی کورد لە ژمارەی ئەندامانی پەرلەمانی عیراق و پۆستەکانی تر چەند دەبێت؟ ئایا هەر کەمبوونەوەیەک یان کەمکردنەوەیەک لە ژمارەی کورددا، چ لە پارێزگاکانی هەرێم یان ناوچە دابڕێنراوەکانی تری کوردستان، تا چەندە مەترسی دەبێت بۆ سەر ئایندەی سیاسیی کورد؟ بۆ خەڵکی کوردستان، هەموو ئەو پرسیارانە پرسیاری رەوان و لەپشتیانەوە کۆڵێک مەترسی هەن، چونکە هەم عیراق بە قۆناغێکی مەترسیداردا تێدەپەڕێت، هەم هەرێمی کوردستان هەرێمەکەی جاران نییە و ئێستا پەرتەوازەیی و ناتەبایی سیمای سەرەکین لە هەرێمدا و هەموو لایەک دەتوانن ئەجێندا خراپەکانی خۆیان بەسەرماندا بسەپێنن، بەڵام ئەگەر لە هەموو ناوچەکانی کوردستان، هەرێم و دەرەوی هەرێمیش، ژمارەمان زیاتر بێت، یان هەر ھیچ نەبێت کەم نەبێتەوە، ئەوا مەترسی و دڵەراوکێکانمان دەڕەوێنەوە.
بۆیە دەبێ هەموومان ئەو راستییە بزانین، بەشداریکردنی بەگوڕ  و تین و بە بەرفراوانی لە سەرژمێرییەکەدا و لەپێشیشەوە لە کەرکوک و خانەقین و شەنگال و موسڵ و زەمار و عەین زالە و ناوچە دابڕێنراوەکانی تر، ئەرکێکی گەورەی نەتەوەیی و نیشتمانی و کوردستانییە، چونکە لەمەودوا، بەپێی ئەو ژمارەیەی کورد لە پارێزگاکانی هەرێم و ناوچە دابڕێنراوەکانی کوردستان و شوێنەکانی تر، لە هەموو بوارەکاندا مامەڵەمان لەگەڵ دەکرێ و هەر بەو سەنگەی دەمانبێ عیراق حیسابمان بۆ دەکات.