بەهۆی ململانێی حزبییەوە، بەداخەوە، ساڵانێكە هەوڵێكی سیاسی و میدیایی بە‌دیدەكرێت‌ بۆ ئەوەی لە هەرێم و عیراقیشدا، حزبەكەی مام جەلال، وەك‌ ناحەزی نوێنەرانی پێكهاتەكانی هەرێم سەیر بكرێت..! زۆرجار وا جاڕدراوە كە پارتی دۆستی پێكهاتەكان بێت و ركابەرەكەشی، دژ. ئەم هەوڵانەش ئامانج لێیان، بە ئاشكرا تێوەگلاندنی زیاتری ئەو نوێنەرانە بووە لە ململانێیەكی حزبایەتیی دڵخواز و تەقلیدیدا.
لە بەرامبەردا، یەكێتی، جگەلەوەی لە سنووری دەسەڵاتی كردەنیی خۆی و هەموو عیراقدا، پەیوەندیی باش و توندوتۆڵی لەگەڵ جەماوەری پێكهاتەكاندا هەیە و رێزیان لێدەگرێت، پێی ئاسایی نەبووە كە نوێنەرانیان لە كوردستان ببنە بەشێك لە ململانێ حزبییەكانی هەرێم. لە هەندێک لە دانوستانە دووقۆڵییەكانیشدا بە وەفدی پارتی دیموكراتیان وتووە: با كورسیی پێكهاتەكان لە پەرلەمان و كۆتاكەیان لە ركابەرییەكانمان بەدووربن، چونكە هەم پێكهاتەكان لەوە گەورەترن كە چەند نوێنەرێك لە پێگەی پەرلەمانیدا نوێنەرایەتیی هەموویان بكەن، هەم دابەشبوونی دیموگرافیشیان لەناو خاكی هەرێم و ناوچە جیاجیاكانیدا شایەنی ئەوەیە كە نوێنەرایەتییەكی دادپەروەرانەی لێ پێكبهێنرێت. 
رێزگرتن لە پێكهاتەكان، جگە لەوەی، لە ئەزموونی كوردستان و عیراقدا، بەشێكە لە دیسكۆرس و میراتی بیری مام جەلال، راسپاردەیەكی ئایدیۆلۆژیشە بۆ پارتە چەپ و دیموكراتەكان. بەپێچەوانەوە، ئەوەی كە دەشێت لە گەوهەردا گرفتێك بۆ پێگەی پێكهاتەكان دروستبكات، ئایدیۆلۆژیا ناسیۆنالیستییەكانن كە زۆرجار بەناوی هەموو نەتەوەوە دەدوێن و دەشیانەوێت هەر ئەوان بن دەستنیشانی بكەن كە كەی دەبێت رێز لەو پێكهاتانە بگیرێت و كەی-یش وەك نەیار و دەستی دەرەكی و دوژمن تەماشا بكرێن!. 
بەمانایەكی راشكاو و گڵۆباڵتر، ئایدیۆلۆژیستە راستڕەو و نەتەوەییەكان، ئەزموونێكی زێڕینیان لە مێژووی مرۆڤایەتیدا نییە تا وانەی لێبوردەیی و پێكەوەژیان بە هێزە چەپ و دیموكراتەكان بدەن. لە واقعی كوردستانیشدا، بەو هەموو قەیرانانەشەوە كە یەكێتی، وەك حزبێك، پێیاندا تێپەڕیوە، بەهۆی پرەنسیپە هزری و سیاسییەكانە‌وە، تائێستا هیچ هەلومەرجێك و تەماحێكی سیاسی پەشیمانی نەكردووەتەوە لەوەی وەك هاووڵاتییەكی خاوەن مافی تەواو لە پێكهاتەكان بڕوانێت، بۆیە ئەو هەوڵانە لە رابردوودا زیاتر بۆ دروستكردنی دووبەرییەك بوو و سەركەوتووش نەبوو. 
رەنگە تاقیكردنەوەی راستەقینە بۆ ئەم پرسە، ئەو ناوچە كوردستانییانە بن‌ كە زیاتر لە پێكهاتەیەكی سۆسیۆلۆژییان تێدایە و تەنها كوردیان لێ ناژی. لەم رووەوە، كەس پێش سەرۆك مام جەلال، خاوەن فەلسەفەیەكی سیاسی و تەنانەت ئیداریی روون و شەفاف نەبووە بۆ ئەو ناوچانە و بەتایبەتی كەركوك. 
راستە راگواستن و بەعەرەبكردن زیانی ستراتیژیی زۆریان لە پێگەی دیموگرافیی كورد داوە لەو ناوچانە، بەڵام لە قۆناغی گەڕانەوەی ئاوارەكان و هەلی باڵادەستیی كورددا لەوێ، ئەوەی رێگربووە لە دووبارەكردنەوەی تاقیكردنەوەی رەگەزپەرستانەی بەعس بەرامبەر بەهەر پێكهاتەیەكی نەژادی و تائیفی و بەناوی تۆڵەكردنەوەوە، هەر یەكێتی بووە.
ئەوانەش كە نوێنەرایەتیی پێكهاتەكانی تری عیراق لە ناوچە كوردستانییەكاندا دەكەن، لەو كاتەوە و تا ئەمڕۆ، بە نوێترین گەواهیدانی پارێزگاری نوێ-ی كەركوكیشەوە، رێزی تەواو لەو كەلەپورە سیاسییە دەگرن كە مام جەلال، چ وەك سكرتێری گشتی و چ وەك سەرۆك كۆمار، دایهێنابوو و ببووە هۆی ئەوەش كە زۆربەی پێكهاتەكان باڵادەستیی كوردیان لەو شارەدا قبوڵ بێت.
بۆیە لەم بارەیەوە، یەكێتی، ناچار نییە بچێتە هەڵوێستی پەرچەكردارەوە لەبەرامبەر ئەوانیتر و‌ ناكۆكیی فكری و سیاسییشەوە‌ لەگەڵ خۆیدا، ئەو نەهاتووە كەی گروپێكی سیاسیی پێكهاتەكان لەبەرژەوەندیی خۆی هەڵوێستی وەرگرت، وەك هاوپەیمان لێی بڕوانێت و بشیكات بە ناحەزی هێزە ركابەرەكانی، كەی-یش بژاردەیەكی سیاسیی پێچەوانەی هەبوو، وەك نەیارو داردەستی داگیركەر لێی بڕوانێت و هەر هێزێكی كوردییش لەگەڵیدا رێك بوو، تەخوینی بكات!. 
ئەم گەمەیە، بە راستی، هەم كۆنە و هەم دواكەوتووانەشە، جێگایەكی دیاریكراویشی‌ لەكایەی سیاسەت و هەنگاوە‌ تەكتیكی و ستراتیژییەكانیدا نییە، بێگومان سۆشیال میدیای ئاڕاستەكراو و ماسمیدیای زەبەلاحیش ناتوانێت رەواجی Promotionی پێبدات!، بۆیە باشترین هەڵوێست ئەوەیە كە كورد خۆی، بە هەموو هێزەكانییەوە، هەم لەگەڵ خۆیدا ئاشتببێتەوە، هەم پەیوەندیشی لەگەڵ پێكهاتەكاندا بكاتە هۆكارێك بۆ پتەوكردنی پێكەوەژیان و متمانە و دۆستایەتی، چونكە ئەمە یەكێكە لە رێگەكان بۆئەوەی پێكهاتەكانی تر، لەبری نەیارێتی و پەنابردن بۆ دەرەوە، لە كورد نزیك ببنەوە و متمانەی پێ بكەن و بەرپرسیارێتیی ناوچە كوردستانییەكانی لەگەڵدا هەڵبگرن و بەهۆی ئەمەوە پاساو بۆ هیچ دەستتێوەردانێكی دەرەكییش لەو ناوچانەدا، نەمێنێت.